樂天皇朝八色小籠包

約7點幾到旺角的雅蘭中心樂天皇朝，無人等位，可以直入…

但係佢得90分鐘用餐時間，所以唔齊人都係唔好入住。

餐具個啲擺得都整齊，同埋乾淨。

呢碟小食，好似要收$15-16。

係鹵水花生同鹵水栗子，

花生好腍，但唔算入味；栗子軟綿，但但栗子甜味，亦無鹵水香味。

但小食黎，一上就比左，無得唔比錢。>.<

                                  

生煎包

第一個上係生剪包，個底煎得幾香，又唔會太油，

皮好軟熟，亦有少少彈性，所以D汁唔會被個皮吸晒，

大家見到，算係多汁(有一半汁我滴左落碗度)

肉味算係幾好，唔太鹹，無咩太多重調味料。

 春雨拌綠蔬

入面有粉絲、菠菜、紅蘿蔔絲、木耳絲，全素食，

醋應該係用烏醋，我個人覺得太酸！

但唔錯的，用的材料大小差不多，食落口感有層次得黎又唔會差太遠。

海鮮喇沙拉麵

講係海鮮，但其實得蝦架咋！


用拉麵取代本身的油麵或粉絲，啲啦麵可以掛得住啲湯，

湯底好香，椰汁味唔算特別濃，辣係少少架姐！但整體的Balance好好。

佢有四隻蝦，兩塊豆腐卜，一隻溏心鹵水蛋。

蝦的殼都係硬身的，唔係軟殻個啲，蝦肉都鮮甜的，

但個湯底溝個拉麵真係無得頂，我地飲晒啲湯 (///0.0///)

話晒總店都係係新加坡個邊，咁喇沙實唔差得去邊！

上海炒年糕

夠香，但唔係大碟的。

通常上海炒年糕我最鐘意係食佢啲菜！

佢啲汁拎黎炒菜，一絕！

年糕煙韌，入味！但因為個人唔太鐘意食太韌的年糕，

所以只食左兩塊姐！

皇朝八色小籠包

噔！噔！噔！噔！終於黎到吸引我黎的主角！

佢有原味小籠包、芝士味、黑松露味、人蔘味、鵝肝味、蟹粉味、麻辣味、蒜味

店員一開始就提醒我地，除左原味之外，全部都唔使點醬汁！


我都有照做架！畢竟都驚失左原本食材的味道。

小籠包的汁都唔少，黑松露味好重同香，同時肉味又唔會被掩蓋左！

佢係肉末帶點筋咁！好正！皮又夠薄！貼近唇邊，好似紙咁。

鵝肝味就無咩特別！又食唔出肝的味道同感覺，

姑且當佢係原味小籠包！

麻辣因為無人食，我不入地獄誰入地獄呢！

好彩，佢入口係香味，辣味唔勁，咬到中間啲辣味先出黎，

辣，但係我能接受的範圍裏面。

蟹粉豆腐

中間部分有一Part酸，應該係淋左少少醋！

旁邊就無酸味的，有鮮味，但唔濃！

個豆腐好滑，豆腐味唔算濃！似百福！

宮廷驢打滾

薄薄一層糯米皮，薄薄一層豆沙餡，

睇到餡同皮都好平均，所以入口兩樣味都岩岩好！

唔太甜，微凍，豆沙味真係好香，因為雪過，皮就唔係軟糯，

淨係軟姐！面撒上花生粉！幾好既一道甜品！

豆沙鍋餅

餅皮係薄的，所以都幾脆，

所以只係食到少少糯米的黏性，始終都薄，

豆沙都係薄薄一層，皮就無咩味！所以一齊食就岩岩好甜味！

值得一試！

總結：

值得一試，但都頗貴，

三個人，約二百蚊左右一個人。

野食品質就正常！又唔係頂級！

最印象深刻就係個個喇沙麵同埋個驢打滾！

都有機會再去試既！對個避風塘炒蟹小籠包有興趣！